ឧបនាយរកដ្ឋមន្រ្តី និងជារដ្ឋមន្រ្តីក្រសួងមហាផ្ទៃ សម្ដេចក្រឡាហោម ស ខេង បានសម្ដែងនូវក្ដីសង្ឃឹមទុកថា គណៈប្រតិភូជប៉ុននឹងមានការចាប់អារម្មណ៍ចំពោះការវិនិយោគពាក់ព័ន្ធនឹងសហគ្រាសធុនតូច និងមធ្យមនៅកម្ពុជា ។
ក្ដីសង្ឃឹមរបស់លោកបែបនេះ ធ្វើឡើងនៅក្នុងឱកាសជំនួបរវាងរូបលោក ជាមួយនឹងប្រតិភូសមាគមជប៉ុន-កម្ពុជា ដែលមានតំណាងក្រុមហ៊ុនចំនួន៣៥ នៅសណ្ឋាគារសូហ្វីតែល ភូគីត្រា រាជធានីភ្នំពេញ កាលពីថ្ងៃទី២៥ មេសា ម្សិលមិញនេះ ។ សម្ដេច ស ខេង មិនត្រឹមតែសង្ឃឹមចំពោះចំណាប់អារម្មណ៍វិនិយោគពាក់ព័ន្ធនឹងសហគ្រាសធុនតូច និងមធ្យមនៅកម្ពុជាទេ លោកក៏សម្ដេចសង្ឃឹមថាភាគីទាំងពីរនឹងអាចស្វែងយល់ពីគ្នាដើម្បីនាំមកនូវផលប្រយោជន៍សម្រាប់ការវិនិយោគ។
បន្ថែមពីលើនេះ សម្ដេចក្រឡាហោម ស ខេង ឧបនាយករដ្ឋមន្រ្តី បានសម្ដែងក្ដីរីករាយដែលបាននជួបជាមួយប្រតិភូសមាគមជប៉ុន-កម្ពុជា ជាលើកទី២ និងបានចាត់ទុកទស្សនកិច្ចរបស់ប្រតិភូសមាគមនៅកម្ពុជាថាជាការរួមចំណែកពង្រឹងទំនាក់ទំនងប្រទេសទាំងពីរ និងជំរុញលើកទឹកចិត្តឱ្យមានការវិនិយោគពីប្រទេសជប៉ុនកាន់តែច្រើនបន្ថែមទៀតនៅកម្ពុជា ៕
